O‘zbekistonda hayvonlarning yuqumli kasalliklari aniqlanganda karantin choralarini joriy etish tartibi rasman belgilandi. Vazirlar Mahkamasi tomonidan qabul qilingan qaror bilan infeksiyaning xavflilik darajasi va tarqalish xususiyatiga qarab cheklov choralari ko‘riladi.

Karantin zonalari qo‘zg‘atuvchilarning biologik xususiyatlari va xavf darajasini hisobga olgan holda belgilanadi. Kasallik aniqlangan hududlarda veterinariya va sanitariya tadbirlari o‘tkaziladi, shuningdek, infeksiya tarqalishi xavfi mavjud bo‘lgan zonalarda qo‘shimcha choralar ko‘riladi.

Profilaktik chora sifatida chegara punktlarida maxsus karantin muassasalari tashkil etiladi. Agar bunday sharoit mavjud bo‘lmasa, hayvonlar to‘g‘ridan-to‘g‘ri fermalarda izolyatsiya qilinadi.

Qoidalar barcha shaxslarga – xususiy mulkdorlardan tortib hayvonlarni saqlash yoki hayvonot mahsulotlarini qayta ishlash bilan shug‘ullanuvchi kompaniyalargacha, biznes shaklidan qat’i nazar, tatbiq etiladi.

Karantin choralariga rioya etilishini Qishloq xo‘jaligi vazirligi huzuridagi Veterinariya va chorvachilikni rivojlantirish qo‘mitasi va uning hududiy bo‘linmalari nazorat qiladi.

Karantin joriy etiladigan yuqumli kasalliklarning aniq ro‘yxati tasdiqlandi. Unga oqsil, cho‘chqalarning Afrika va klassik vabosi, parrandalarning yuqori patogenli grippi, Nyukasl kasalligi, quturish, kuydirgi, brutsellyoz, hayvonlar sili va boshqa xavfli kasalliklar kiritilgan.

Eslatib o‘tamiz, O‘zbekistonda qo‘shni hududlardan kelgan tashvishli xabarlar fonida 18 apreldan 18 maygacha chorvachilikda sanitariya-epidemiologik gigiena oyligi e’lon qilingan. Qishloq xo‘jaligi vazirligi va Fermerlar kengashi chorva mollariga tahdid soluvchi xavfli virusli kasallik – oqsilning kirib kelishi va tarqalishining oldini olish bo‘yicha keng ko‘lamli profilaktik choralarni boshlagan.

Source: podrobno.uz