UEFA tomonidan e'lon qilingan qarorga ko‘ra, Benfikaning argentinalik futbolchisi Janluka Prestianni Chempionlar Ligasi doirasidagi “Real Madrid”ga qarshi o‘yinda gomofobik xatti-harakatlari uchun 6 o‘yinga diskvalifikatsiya qilindi.

UEFA juma kuni ma'lum qilganidek, Prestianniga nisbatan qo‘shimcha uch o‘yinlik diskvalifikatsiya ikki yillik sinov muddati bilan shartli ravishda belgilangan. U avvalgi bir o‘yinga vaqtinchalik diskvalifikatsiyani o‘tab bo‘lgan.

Argentinalik vinger fevral oyida “Real Madrid”ning 1:0 hisobidagi g‘alabasi bilan yakunlangan Chempionlar Ligasi pley-off birinchi o‘yinida “Real” hujumchisi Vinisius Juniorga nisbatan kamsituvchi so‘zlar aytganlikda ayblangan edi.

Birinchi bo‘limda Vinisius “Real”ni oldinga olib chiqqanidan so‘ng o‘yin 11 daqiqaga to‘xtatilgan edi. Televizion tasvirlarda Prestianni og‘zini ko‘ylagi bilan bir necha marta yopib, Vinisius va yaqin atrofdagi jamoadoshlari tomonidan irqiy haqorat sifatida talqin qilingan izohlar bergani ko‘rsatilgan.

Prestianni irqiy haqorat qilganlik ayolini rad etib, Vinisius uni noto‘g‘ri eshitganini aytgan. “Real”ning Aurelien Tchuameni esa argentinalik futbolchi unga Vinisiusni “maymun” deb atamaganini, aksincha gomofobik izoh berganini aytgan.

UEFA, shuningdek, diskvalifikatsiyani butun dunyo bo‘ylab kengaytirish uchun FIFAdan so‘rashini ma'lum qildi. Diskvalifikatsiya Prestianni 25 fevral kuni “Real” 2:1 hisobida g‘alaba qozongan ikkinchi o‘yinda o‘tagan vaqtinchalik bir o‘yinlik diskvalifikatsiyani o‘z ichiga oladi.

Benfika klubi Prestianniga nisbatan qo‘llanilgan jazo haqida xabardor qilinganini tasdiqladi. Klub bayonotiga ko‘ra, uch o‘yinlik amaldagi diskvalifikatsiyadan bittasi o‘talgan, qolgan ikkitasi esa UEFA musobaqalari yoki FIFA kontekstidagi Argentina terma jamoasi o‘yinlarida o‘talishi kerak. Prestianni Argentina terma jamoasida faqat bir marta, noyabr oyida Angolaga qarshi o‘rtoqlik o‘yinida zaxiradan maydonga tushgan.

Source: www.aljazeera.com