Keniya prezidenti Uilyam Ruto Italiyadagi keniyaliklar bilan uchrashuvda Nigeriya ingliz tilini tushunish qiyinligi va tarjimon kerakligini aytib, ijtimoiy tarmoqlarda katta norozilikka sabab bo‘ldi.

Ruto: “Agar nigeriyalikning gapiga quloq solsangiz, nima deyayotganini bilmaysiz – tarjimon kerak”, dedi va keniyaliklar “dunyodagi eng yaxshi ingliz tilida gaplashishini” maqtandi.

Nigeriyaliklar va boshqa afrikaliklar bu so‘zlarni qattiq tanqid qilishdi. Zimbabve jurnalisti Xopuell Chin’ono: “Ingliz tili mustamlakachilik tili, aql-idrok yoki milliy taraqqiyot o‘lchovi emas”, deb yozdi.

Ikkala davlat ham sobiq Britaniya mustamlakasi bo‘lib, ingliz tili rasmiy til hisoblanadi, ammo har biri o‘ziga xos talaffuz va fonetik tuzilishga ega. Nigeriyada 500 dan ortiq til mavjud bo‘lib, ular ingliz tilining ohang va intonatsiyasiga ta’sir qiladi.

Ruto Keniya ta’lim tizimi kuchli ingliz tilini berishini ta’kidlab, “Biz dunyodagi eng yaxshi ingliz tilida gaplashamiz. Nigeriyalikning ingliz tilini eshitsangiz, nima deyayotganini bilmaysiz”, dedi.

Sobiq nigeriyalik senator Shexu Sani: “Ruto Nobel mukofoti sovrindori bo‘lgan mamlakatning ingliz tilini masxara qilmoqda. Bu Achebe va Chimamanda yurti”, deb yozdi.

Ko‘plab foydalanuvchilar Rutoga o‘z fuqarolarining muammolari – yashash narxi va ishsizlikka e’tibor qaratishni maslahat berishdi.

Keniya va Nigeriya o‘rtasidagi onlayn janjallar tez-tez uchrab turadi, ular iqtisodiy taqqoslashlar, pop-madaniyat va sport atrofida bo‘ladi. Bu safargi bahs Tinubuning avvalgi “nigeriyaliklar keniyaliklardan yaxshiroq” degan gapiga javob bo‘lishi mumkin.

Source: www.bbc.com