Sun'iy intellekt yordamida kashf etilgan tabiiy molekula BRP (beyn-regulyator peptid) to'g'ridan-to'g'ri miyaning ishtaha markaziga ta'sir qiladi. Olimlarning fikricha, bu semizlikni davolashda yon ta'sirlarni kamaytirishi mumkin.

Ozempic, Wegovy va Mounjaro kabi GLP-1 gormonini taqlid qiluvchi in'ektsiyalar ishtahani bostirishda samarali bo'lsa-da, ko'ngil aynishi, qusish, diareya va qorin og'rig'i kabi nojo'ya ta'sirlarga ega. BRP esa faqat gipotalamusga ta'sir qilib, bu muammolarni kamaytirishi kutilmoqda.

Buyuk Britaniya Tibbiy Tadqiqot Kengashining molekulyar neyroendokrinologiya professori Giles Yeo DWga bergan intervyusida: "Ozempic va shu kabi dorilar asosan orqa miyaga ta'sir qiladi, bu esa to'liqlik hissini keltirib chiqaradi, ammo ko'ngil aynishi kabi yon ta'sirlarga olib keladi. BRP esa faqat gipotalamusni nishonga oladi", dedi.

Stanford Medicine tadqiqotchilari tomonidan ishlab chiqilgan Peptide Predictor AI vositasi 20 000 ga yaqin inson genlarini skanerdan o'tkazib, 2683 potentsial gormon-peptidlarni aniqladi. Ulardan 100 ga yaqini sinovdan o'tkazildi va BRP eng samaralisi bo'lib chiqdi. Semiz sichqonlarga kunlik in'ektsiyalar berilganda, ular vazn yo'qotgan, davolanmagan hayvonlar esa vazn ortgan.

Michigan universiteti professori Randy J. Seeley: "Peptidlarning katta hajmini saralash jasorati hayratlanarli. Men bu ishdan hayratdaman", dedi. Biroq u hayvonlardagi muvaffaqiyatning odamlarga o'tishini oldindan aytish qiyinligini ta'kidladi.

Tadqiqotning katta muallifi Katrin Svensson kompaniya asos solib, yaqin kelajakda insonlarda klinik sinovlarni boshlashni rejalashtirmoqda. BRPning yana bir afzalligi shundaki, hayvonlarda u yog'ni kamaytirgan, ammo mushaklarni saqlab qolgan.

Professor Yeo: "Dunyoda bir milliardga yaqin odam semizlikdan aziyat chekmoqda va hozir semizlikdan ochlikdan ko'ra ko'proq odam o'lmoqda. Semizlikni davolash uchun qancha ko'p vositalar bo'lsa, shuncha yaxshi", dedi.

Source: www.dw.com