Maktabgacha va maktab ta’limi vazirligi rahbariyati 21-aprel kuni bo‘lib o‘tgan matbuot anjumanida o‘qituvchilarni maktab ta’mirlash ishlariga majburan jalb qilish va ota-onalardan pul yig‘ish amaliyotiga qat’iy qarshi ekanligini bildirdi. Vazir E’zoza Karimova bu borada vazirlik pozitsiyasi qat’iy ekanini ta’kidlab, maktab remonti uchun pul yig‘ish hech qachon qonunchilikda belgilanmaganini aytdi.

Vazirning so‘zlariga ko‘ra, maktab va bog‘chalarni ta’mirlash masalalari mahalliy budjet mablag‘lari hisobidan amalga oshirilishi kerak va bu hokimliklar vakolatiga kiradi. U ota-onalardan pul yig‘ishga mutlaqo qarshi ekanligini bir necha bor takrorladi.

Vazir o‘rinbosari Temur Komilovning ma’lumotiga ko‘ra, 2026-yil uchun davlat budjetidan vazirlikka 63,7 trillion so‘m ajratilgan bo‘lib, shundan 84,7 foizi (53,969 trillion so‘m) 10 200 maktab va 7000 davlat bog‘chasidagi 1 milliondan ziyod xodimlarning maoshiga yo‘naltiriladi. Qolgan mablag‘lar kapital qurilish va turli tanlovlar uchun sarflanadi.

Komilov maktab va bog‘chalarni ta’mirlash uchun bir necha manbalar mavjudligini aytdi: “Tashabbusli budjet” loyihasi, Moliya vazirligining xalqaro moliya institutlari bilan hamkorlikdagi “Mahallani rivojlantirish” loyihasi, hamda tuman va shaharlarga ajratiladigan maqsadli mablag‘lar. Biroq u 10 200 maktabning barchasini bir vaqtda ta’mirlash uchun yetarli mablag‘ ajratilmayotganini tan oldi.

Vazir o‘rinbosari o‘qituvchilarni ta’mirlash ishlariga jalb qilishni keskin qoraladi: “Maktab o‘qituvchisi o‘quv yiliga tayyorgarlik jarayonida ta’mirlash ishlariga jalb qilinadigan mardikor emas”. U 2016-2026-yillarda maktab va bog‘chalarning kapital qurilishi va moddiy-texnik bazasiga 24 trillion so‘mdan ortiq mablag‘ yo‘naltirilganini, ammo hali ham kamchiliklar borligini qayd etdi.

Komilov fuqarolarni bunday noqonuniy holatlar yuz berganda vazirlikka murojaat qilishga chaqirdi va birgalikda bu muammoni hal qilishga tayyor ekanliklarini bildirdi.

Source: www.gazeta.uz