Chad rasmiylari 28-oktabr kuni Boko Haram jangarilari harbiy bazaga hujum qilib, kamida 23 nafar xavfsizlik xodimini o‘ldirganini ma’lum qildi. Hujum dushanba oqshomida Chad, Niger, Nigeriya va Kamerun chegaralari tutashgan Chad ko‘li qirg‘og‘idagi harbiy bazaga uyushtirilgan.

Hujumda o‘nlab chadlik askar yaralangan, ammo hujum qaytarilgan. Prezident Mahamat Idriss Debi Itno Facebook’dagi postida “Boko Haram terror guruhi kecha Barka Toloromdagi harbiy bazamizga qo‘rqoq hujum uyushtirdi. Biz bu tahdid butunlay yo‘q qilinmaguncha kurashni yangi qat’iyat bilan davom ettiramiz”, deb yozgan.

Boko Haram asli Shimoliy Nigeriyada paydo bo‘lgan bo‘lsa-da, so‘nggi o‘n yil ichida Chad ko‘li va undan tashqariga tarqaldi. Birlashgan Millatlar Tashkiloti ma’lumotlariga ko‘ra, guruh bir necha ming kishini o‘ldirgan va millionlab odamlarni ko‘chirishga majbur qilgan.

So‘nggi yillarda Boko Haram Chad ko‘li atrofida askarlarga hujumlar va odam o‘g‘irlashlarni kuchaytirdi. 2024-yil oktabrdagi hujumda 40 ga yaqin chadlik askar halok bo‘lgan edi. Debi bunga javoban ikki hafta davomida “shaxsan” o‘zi boshchilik qiladigan qarshi hujum boshlagan.

Hujum 2025-yil fevralida yakunlangan va Chad armiyasi Boko Haram “Chad hududida boshpana topa olmasligini” da’vo qilgan. Biroq Chad ko‘lining orollari va botqoqliklari Boko Haramning raqib guruhi “Islomiy Davlat G‘arbiy Afrika viloyati” (ISWAP) kabi boshqa qurolli guruhlar uchun ham boshpana bo‘lib xizmat qilmoqda.

Source: www.dw.com