AQSh prezidenti Donald Tramp o‘zining Truth Social platformasida Eron «moliyaviy jihatdan qulab» borayotganini va Vashingtonning Eron portlariga qarshi dengiz blokadasi tufayli mamlakat kuniga 500 million dollar yo‘qotayotganini da'vo qildi.

Trampning yozishicha, Eron «naqd pulga och» va «Hormuz bo‘g‘ozini zudlik bilan ochishni» xohlaydi. U harbiy va politsiya xodimlari maosh olmayotganidan shikoyat qilayotganini ta'kidladi.

AQSh blokadasi 13 aprel kuni soat 14:00 GMTda boshlangan. Shu vaqtdan beri AQSh Hormuz bo‘g‘ozi yaqinida Eron bayrog‘i ostidagi tankerni o‘qqa tutib, musodara qilgan va Eronga yuk olib ketayotgan kemalarni yo‘naltirgan. Eron qurolli kuchlari buni «noqonuniy harakat» va «qaroqchilik» deb atadi.

Bunga javoban Eron Hormuz bo‘g‘ozini barcha xorijiy kemalar uchun yopdi va bir nechta xorijiy kemalarni qo‘lga oldi. Eron birinchi vitse-prezidenti Muhammad Rizo Aref 19 aprel kuni «Hormuz bo‘g‘ozining xavfsizligi bepul emas»ligini aytdi.

Eron parlamenti spikeri Muhammad Boqir Qolibof to‘liq sulh faqat AQSh dengiz blokadasi bekor qilingan taqdirdagina mumkinligini bildirdi. Tahlilchilar blokada Eronga zarar yetkazayotganini, ammo mamlakatning iqtisodiy va siyosiy irodasi uni bardoshli qilishiga ishonishini aytishmoqda.

Eron neft eksportining 80 foizi Hormuz bo‘g‘ozi orqali amalga oshiriladi. Mart oyida Eron kuniga 1,84 million barrel neft eksport qilgan. Blokadaga qaramay, Eron dengizda 160-170 million barrel neft zaxirasiga ega, bu avgustgacha daromad keltirishi mumkin.

Eron, shuningdek, Hormuz bo‘g‘ozidan o‘tish uchun to‘lovlar undirish orqali qo‘shimcha daromad olmoqda. Ba'zi kemalar 2 million dollargacha to‘lagani xabar qilingan.

Eron rasmiylari mamlakat birligini ta'kidlab, hukumat va harbiy kuchlar o‘rtasida hech qanday ixtilof yo‘qligini bildirishdi. Prezident Masud Pezeshkiyon «Eronda radikallar yoki mo''tadillar yo‘q, biz hammamiz eronlik va inqilobchimiz» dedi.

Source: www.aljazeera.com