AQSh prezidenti Donald Tramp Amerika harbiy-dengiz kuchlariga Hormuz bo‘g‘ozida minalarni qo‘yayotgan har qanday Eron qayig‘ini “otib tashlashni” buyurganini aytdi. Bu ikki davlat o‘rtasidagi mo‘rt sulhni xavf ostiga qo‘yishi mumkin.

Tramp, shuningdek, harbiylar strategik suv yo‘lidan portlovchi moddalarni olib tashlash harakatlarini kuchaytirishini ma’lum qildi. “Men AQSh harbiy-dengiz kuchlariga Hormuz bo‘g‘oziga minalarni qo‘yayotgan har qanday qayiqni otib tashlashni buyurdim. Hech qanday ikkilanish bo‘lmasligi kerak”, deb yozdi u ijtimoiy tarmoqdagi postida.

Eron rasmiylari o‘z mamlakatlari o‘zini himoya qilishga va har qanday AQSh hujumiga javob berishga tayyorligini bir necha bor ta’kidlagan. Hormuz bo‘g‘ozi urushdan oldin uzluksiz ochiq bo‘lgan bo‘lsa, hozirda asosiy tortishuv nuqtasiga aylangan.

Eron bo‘g‘ozni AQSh-Isroil harbiy kampaniyasiga javoban yopib qo‘ygan va hozirda Fors ko‘rfazini Hind okeani bilan bog‘laydigan o‘tish yo‘liga bo‘lgan huquqlarini da’vo qilmoqda. Hormuzning yopilishi neft narxini oshirib, Trampga ichki siyosiy bosimni kuchaytirdi.

Ikki haftalik sulh kuchga kirganidan so‘ng, Tramp Eron portlariga dengiz blokadasini e’lon qildi va Livan sulhga qo‘shilganidan keyin Tehron Hormuzni qayta ochgan bo‘lsa ham, blokadani saqlab qoldi. Eron blokadani olib tashlashni AQSh bilan muzokaralarni qayta boshlash uchun old shart sifatida qo‘ymoqda.

Pentagon Eron neftini olib ketayotgan tankerni Hind okeanida “dengiz intervensiyasi va tashrif huquqi” ostida ushlab qolganini ma’lum qildi. AQSh harbiylari, shuningdek, Eron kemasini qo‘lga olib, o‘nlab boshqa kemalarni orqaga qaytishga buyurgan.

Eron ham Hormuz bo‘g‘ozi atrofida dengiz qoidalarini buzgan deb hisoblagan xorijiy tijorat kemalarini qo‘lga olgan. Oq uy Tramp blokadadan “mamnun” ekanini aytdi. Trampning ta’kidlashicha, AQSh Hormuz bo‘g‘ozi ustidan “to‘liq nazoratga” ega va o‘tish joyi “mahkam yopilgan”.

Source: www.aljazeera.com