Rossiya sudi O‘zbekiston fuqarosini “KATIBA TAVHID VAL-JIHOD” nomli taqiqlangan terroristik tashkilotga aloqadorlikda ayblab, 12 yil qamoq jazosiga hukm qildi. Ushbu tashkilot xalqaro miqyosda faoliyat yuritadi va Rossiyada noqonuniy deb topilgan.

Tergov ma’lumotlariga ko‘ra, mahkum o‘zining bank rekvizitlari va telefon raqamidan foydalanib, jangarilar uchun qurol-yarog‘, o‘q-dorilar va jihozlar sotib olishga mo‘ljallangan mablag‘larni yig‘gan. Ushbu mablag‘lar terrorchilik faoliyatini moliyalashtirish uchun ishlatilgan.

2024-yil mart oyida u yana bir shaxsni tashkilot faoliyatiga jalb qilishga urinib ko‘rgan. Operativ tadbirlar davomida mahkumning o‘z kartasiga 10 ming rubl o‘tkazishni so‘rab, ushbu pulni terrorchilarga yetkazishni rejalashtirgani aniqlangan.

Sud to‘plangan dalillarni yetarli deb topib, unga uzoq muddatli qamoq jazosini tayinladi. Avvalroq, 33 yoshli O‘zbekiston fuqarosi ayol “KATIBA TAVHID VAL-JIHOD” xalqaro terrorchilik guruhini moliyalashtirishda ishtirok etgani uchun 15 yil qattiq rejimli koloniyaga hukm qilingan edi.

Source: podrobno.uz