O‘zbekiston Bosh prokuraturasi huzuridagi Iqtisodiy jinoyatlarga qarshi kurashish departamenti tomonidan Koreyaga ishchi yuborish bilan bog‘liq yirik korrupsion sxema aniqlandi. Uyushgan jinoiy guruh tarkibiga Tashqi mehnat migratsiya agentligi va xususiy bandlik agentliklarining sobiq mansabdorlari kirgan.

Dastlabki ma’lumotlarga ko‘ra, guruh 35 nafar fuqarodan jami 263,5 ming dollar olib, ularni Koreyaga ishga yuborishni va’da qilgan. Shu bilan birga, firibgarlik yo‘li bilan har bir fuqarodan 7-12 ming dollardan qariyb 90 million dollar yig‘ilgan.

Tergov davomida guruhning 230 nafar fuqaroni Koreyaga yuborish evaziga 580 ming dollar olgani, shuningdek, Koreyaga jo‘natilgan ming nafar fuqarodan noqonuniy ravishda 5,6 million dollar undirgani ma’lum bo‘ldi. Umumiy noqonuniy mablag‘ miqdori 45 million dollarga yetgan.

Hozirda Koreyaga ishga yuborilmagan 600 dan ortiq fuqarodan kelib tushgan murojaatlar o‘rganilmoqda. Tergov organlari yetkazilgan zarar miqdorini aniqlash va mablag‘larni undirish choralarini ko‘rmoqda.

Mazkur holat yuzasidan jinoyat ishi qo‘zg‘atilgan bo‘lib, tergov harakatlari davom etmoqda. Departament jabr ko‘rgan fuqarolarni 71 233 10 07 raqamli ishonch telefoniga murojaat qilishga chaqirgan va murojaatchilarning shaxsi sir saqlanishini bildirgan.

Eslatib o‘tamiz, avvalroq Migratsiya agentligining Namangan viloyati filiali bosh mutaxassisi fuqarolarni Koreyaga ishga yuborish evaziga 41 ming dollar olgan vaqtida qo‘lga olingan edi. Aniqlanishicha, Migratsiya agentligining xodimlari 2024-yilda 80 dan ortiq fuqarolarni Koreyaga ishga yuborish uchun 700 ming dollardan ortiq pul olgan.

Source: www.gazeta.uz