Toshkent viloyati Zangiota tumanida rashk oqibatida sodir etilgan qotillik ishi bo‘yicha sud hukmi e’lon qilindi. 25 yoshli erkak 30 yoshli raqibiga 17 marta pichoq urib, uni o‘ldirgan.

Sudda ayblanuvchi 42 yoshli do‘kon xodimi bilan diniy nikohda ekanligini va umumiy farzand tarbiyalayotganini, bu haqda onasi bilmasligini aytgan. U pushaymonligini bildirgan bo‘lsa-da, marhumning qarindoshlari eng og‘ir jazoni talab qilishgan.

Sud uni Jinoyat kodeksining 97-moddasi 2-qismi “j” bandi (“Alohida shafqatsizlik bilan qasddan odam o‘ldirish”) bo‘yicha aybdor deb topib, 16 yil ozodlikdan mahrum qildi.

Avvalroq Farg‘ona viloyati Dang‘ara tumani jinoyat ishlari bo‘yicha sudi 29 yoshli erkakni o‘z onasini alohida shafqatsizlik bilan o‘ldirganlikda aybdor deb topib, umumiy rejimdagi koloniyada 18 yilga hukm qilgan edi.

Source: podrobno.uz