Qashqadaryo viloyatida Muborak gazni qayta ishlash zavodi atrofida ekologik qoidabuzarliklar uchun hisoblangan 10,8 milliard so‘m kompensatsiya bo‘yicha bahs kelib chiqdi. Korxona ekopolitsiya qaroriga rozi bo‘lmay, sudga shikoyat qildi va tadbirkorlik ombudsmaniga murojaat etdi.

Ekologik nazorat inspeksiyasi tekshiruvi natijasida chiqindilarni noqonuniy joylashtirish, havo ifloslanishi, oltingugurt oksidlari, uglerod va azotning ruxsat etilgan miqdoridan oshib ketishi, shuningdek, neft mahsulotlari aralashgan oqava suvlarni ochiq maydonlarga tashlash kabi qoidabuzarliklar aniqlandi.

Zavod ma'muriyati tekshiruv qonun buzilgan holda o‘tkazilganini va kompensatsiya dalolatnomasi bir tomonlama tuzilganini da'vo qilmoqda. Ular Prezident huzuridagi tadbirkorlik ombudsmaniga murojaat qilgan.

Ombudsman tekshiruvi natijasida ekologiya idorasi mansabdor shaxslari tomonidan qonunbuzarliklarga yo‘l qo‘yilgani aniqlanib, ularga nisbatan ma'muriy bayonnoma tuzilgan. Hozirda nizo Toshkent tumanlararo iqtisodiy sudida ko‘rilmoqda.

Korxona sud jarayoni tugamaguncha tekshirilmagan ma'lumotlarning tarqalishi ishbilarmonlik obro‘siga zarar yetkazishi mumkinligini ta'kidlamoqda.

Eslatib o‘tamiz, O‘zbekistonda biznesning ekologik qoidabuzarliklar uchun javobgarligi kuchaytirilgan. Suv ob'ektlarini ifloslantirgan yuridik shaxslarga tabiatga yetkazilgan zararning o‘n barobari miqdorida jarima solinadi.

Source: podrobno.uz