Xitoy Tashqi Ishlar Vazirligi rasmiy vakili Mao Ninning xabar berishicha, 1-7-aprel kunlari Urumchi shahrida Xitoy, Afg‘oniston va Pokiston o‘rtasida norasmiy muzokaralar bo‘lib o‘tdi. Delegatsiyalar tarkibiga ushbu mamlakatlarning tashqi siyosat, mudofaa va xavfsizlik uchun mas’ul idoralari vakillari kirdi.

Mao Ninning so‘zlariga ko‘ra, Afg‘oniston va Pokiston tomonlari BMT nizomi maqsadlari va ruhiga hamda tinch-totuv yashashning beshta tamoyiliga sodiqliklarini tasdiqladi. Ular mavjud kelishmovchiliklarni imkon qadar tezroq hal qilishga tayyor ekanini, Afg‘oniston-Pokiston munosabatlarini normallashtirishga intilishlarini bildirdi va vaziyatning keskinlashuviga olib keladigan harakatlardan tiyilishga kelishib oldi.

Vakilning qo‘shimcha qilishicha, har uch tomon beqaror va o‘zgaruvchan xalqaro hamda mintaqaviy vaziyatda Afg‘oniston va Pokiston o‘rtasida do‘stona aloqalarni saqlab qolish har ikki davlat xalqlari, shuningdek, Janubiy Osiyodagi tinchlik va barqarorlik uchun hayotiy ahamiyatga ega degan fikrda yakdildir.

Maslahatlashuvlar davomida delegatsiyalar Afg‘oniston-Pokiston munosabatlarini har tomonlama tartibga solish rejasini muhokama qilishga kelishib olgan va ustuvor masalalarni belgilagan. Xitoy muloqot uchun maydon taqdim etishda va uch davlat o‘rtasidagi amaliy hamkorlikni mustahkamlashga ko‘maklashishda davom etadi.

Afg‘oniston va Pokiston o‘rtasidagi ilgari o‘zaro ayblovlar va chegaradagi to‘qnashuvlar bilan cheklanib kelgan keskinlik 2026-yilning fevral oyida ochiq eskalatsiya bosqichiga o‘tdi. Bu muzokaralar mintaqaviy tinchlik uchun muhim qadam bo‘lishi mumkin, ammo amalga oshirilishi kuzatilishi kerak.

Source: www.gazeta.uz