️ AQSh va Isroil tomonidan boshlangan zarbalardan so‘ng darhol Eron o‘t ochishni to‘xtatishni muhokama qilishni taklif qildi va bu signalni vositachilar orqali amerikalik tomonlarga yetkazdi. Bu xabar The New York Times gazetasining manbalariga tayangan holda berilgan.

️ Nashrning ma’lumotlariga ko‘ra, hujumlardan keyingi kuni Eron razvedka vazirligi xodimlari Markaziy razvedka boshqarmasi (CIA) bilan bog‘lanib, mojaroni tugatish shartlarini muhokama qilishni taklif qilgan. Biroq, gazeta manbalarining ta’kidlashicha, Isroil rasmiylari, Eronning harbiy salohiyatiga maksimal zarar yetkazishga intilgan holda, Vashingtondan bu tashabbusni jiddiy qabul qilmaslikka chaqirgan. Hozirgi vaqtda AQSh haqiqatan ham Eronning taklifini jiddiy deb hisoblamaydi.

️ AQSh prezidenti Donald Tramp 3-mart kuni TruthSocial ijtimoiy tarmog‘ida Eron bilan muzokaralar olib borish endi “juda kech” ekanligini yozgan. U Eronning havo hujumidan mudofaa tizimi, harbiy-havo kuchlari, harbiy-dengiz floti va mamlakat rahbariyati “deyarli yo‘q qilingan” deb da’vo qilgan. Tramp o‘z postiga The Washington Post gazetasidagi maqolaga havola qo‘shgan bo‘lib, unda tarixiy Eron tahdidlari AQShni Yaqin Sharqda harbiy bazalarni joylashtirishga majbur qilgan, ammo hozirgi ma’muriyat Eron atrofidagi vaziyatni quruqlikdagi bosqinchilik qilmasdan o‘zgartira olgani haqida da’vo qilingan.

Source: kun.uz