AQSh, Kanada va Avstraliyadagi ko‘plab universitet va maktablar kiberhujumga uchradi. Hujum natijasida minglab ta’lim muassasalari tomonidan foydalaniladigan Canvas dasturi ishdan chiqdi.

Hujum uchun ShinyHunters nomli xakerlik guruhi mas’uliyatni o‘z zimmasiga oldi. Canvas egasi Instructure kompaniyasi payshanba kuni tizim “ko‘pchilik foydalanuvchilar uchun mavjud”ligini ma’lum qildi, biroq juma kuni ham ayrim universitetlarda uzilishlar kuzatildi.

Missisipi shtat universiteti juma kungi yakuniy imtihonlarni kechiktirishga majbur bo‘ldi. Meteorologiya talabasi Aubrey Palmerning so‘zlariga ko‘ra, talabalar 2900 so‘zlik insho topshirganidan so‘ng ekranlarida to‘lov talab qiluvchi xabar paydo bo‘lgan.

Xabarda “ShinyHunters Instructure’ni (yana) buzdi” deb yozilgan va o‘g‘irlangan ma’lumotlarni e’lon qilmaslik uchun bitkoinda to‘lov talab qilingan. Palmerning aytishicha, professor va o‘nlab talabalar bir xil xabarni olgan va xona ichida sarosima hukm surgan.

Sidney universiteti talabalarga Canvas’ga kirmaslikni buyurdi. Britaniya Kolumbiyasi universiteti esa talabalarni darhol tizimdan chiqishga chaqirdi. Chikago universiteti Canvas sahifasini vaqtincha o‘chirib qo‘ydi.

ShinyHunters avvalroq Jaguar Land Rover’ga qilingan yirik hujum bilan bog‘langan. Guruh o‘g‘irlangan ma’lumotlarni nima qilishni rejalashtirayotgani haqida ma’lumot bermagan.

Source: www.bbc.com