Toshkent shahar hokimligi poytaxtning mashhur Brodvey (Sayilgoh ko‘chasi) va unga tutash bog‘, yashil hududlar, piyodalar yo‘laklari hamda shahar infratuzilmasi elementlarini kompleks yangilashni rejalashtirgan.
Hokimlik xabariga ko‘ra, tashabbus piyodalar infratuzilmasini rivojlantirish, xavfsiz va to‘siqsiz shahar muhitini ta’minlash, shuningdek, jamoat joylarini obodonlashtirish va ularning noyob poytaxt qiyofasi hamda atmosferasini saqlashga qaratilgan.
Ta’kidlanishicha, Toshkent Brodveyi – Sayilgoh ko‘chasi – poytaxtning eng taniqli sayr qilish joylaridan biri bo‘lib, unda an’anaviy ravishda rassomlar, musiqachilar, shahar aholisi va mehmonlari ishtirokida faol ko‘cha hayoti kechadi. Hokimlikda yuqori piyodalar yuklamasi va ushbu hududning ahamiyati uning keyingi rivojlanishi uchun zamonaviy, barqaror va ehtiyotkor yechimlarni talab qilishi qayd etilgan.
E’lon qilingan ma’lumotlarga ko‘ra, hozirgi holat tahlili nafaqat piyodalar zonasining o‘zini, balki unga tutash hududlarni ham bosqichma-bosqich yangilash zarurligini ko‘rsatgan.
Loyiha Yagona dizayn-kodeks va shahar hududini kompleks rivojlantirish tamoyillari asosida amalga oshiriladi. Konsepsiyani tayyorlashda hokimiyat aholi va professional jamoatchilik takliflarini hisobga olish niyatida.
Hokimlikda Brodvey ochiq jamoat maydoni maqomini saqlab qolishi, ko‘cha rassomlari kabi ijodiy muhit vakillari esa shahar atmosferasining bir qismi bo‘lib qolishi ta’kidlangan. Loyihaning asosiy vazifasi, xabarda qayd etilishicha, shahar faolligini cheklash emas, balki uni tartibga solish va yanada qulay, ochiq hamda xavfsiz muhit yaratishdan iborat.
Loyiha doirasida yo‘l va piyodalar yo‘laklari qoplamasini yangilash, piyodalar marshrutlarini yaxshilash, yoritish tizimini modernizatsiya qilish, favvoralarni rekonstruksiya qilish, yangi skameykalar, axlat qutilari va boshqa obodonlashtirish elementlarini o‘rnatish rejalashtirilgan. Shuningdek, ko‘kalamzorlashtirish va irrigatsiya tizimini rivojlantirish, Yagona dizayn-kodeks talablariga muvofiq reklama va tabelalarni tartibga solish, noqonuniy inshootlarni demontaj qilish va videokuzatuv tizimlarini joriy etish ko‘zda tutilgan.
Bundan tashqari, mavjud daraxtlar profil mutaxassislari nazorati ostida tekshiruvdan o‘tkazilmoqda. Hokimlik, shuningdek, kamida 1000 ta yangi yashil ko‘chatlar, jumladan, daraxtlar, butalar va manzarali o‘simliklar ekish niyatida.
Source: kun.uz