Abu-Dabidagi Etihad Airways aviakompaniyasi Toshkentga to‘g‘ridan-to‘g‘ri reyslarni ochishni rejalashtirmoqda. Bu haqda O‘zbekiston Transport vazirligining matbuot xizmati xabar berdi. Kelishuv vazirlik o‘rinbosari Jasurbek Choriyev va aviakompaniyaning bosh operatsion direktori, kapitan Majed Al-Marzuki o‘rtasidagi uchrashuvda erishildi.

Uchrashuvda O‘zbekiston va Birlashgan Arab Amirliklari (BAA) o‘rtasidagi havo aloqasining hozirgi holati va rivojlanish istiqbollari muhokama qilindi. Aviakompaniyaning O‘zbekistonda muntazam reyslarni boshlash va marshrut tarmog‘ini bosqichma-bosqich kengaytirish masalalari ko‘rib chiqildi. Natijada, 17 avgustdan boshlab Etihad Airways tomonidan Toshkent – Abu-Dabi – Toshkent yo‘nalishi bo‘yicha muntazam reyslar ochilishi to‘g‘risida kelishuvga erishildi.

To‘g‘ridan-to‘g‘ri havo aloqasining tiklanishi o‘zbekistonlik yo‘lovchilarga Etihad Airwaysning keng marshrut tarmog‘idan foydalanish va Abu-Dabi orqali qulay almashinuvlar bilan Yevropa, Osiyo, Avstraliya, Afrika va Shimoliy Amerikadagi 70 dan ortiq xalqaro yo‘nalishlarga parvoz qilish imkoniyatini beradi. Bundan tashqari, Etihad Airways va O‘zbekiston havo yo‘llari o‘rtasida interlayn tashish va kod-shering shartnomalari tuzish bo‘yicha muzokaralar boshlanganligi tasdiqlandi.

Bu kelishuvlar O‘zbekistondan mavjud marshrutlar geografiyasini sezilarli darajada kengaytirishga va Toshkentning mintaqaviy aviatsiya markazi sifatidagi o‘rnini mustahkamlashga xizmat qiladi, bu esa iqtisodiy o‘sish va turizmni rag‘batlantirish uchun muhim ahamiyatga ega.

Source: kun.uz