Milliy Statistika qo‘mitasi ma’lumotlariga ko‘ra, O‘zbekistonda mart oyi yakunlarida oylik inflyatsiya ko‘rsatkichi 0,6 foizni tashkil etdi. Bu ko‘rsatkich dekabrdan beri qayd etilgan eng yuqori darajadir. Yillik hisobda narxlar o‘sish sur’ati bir oy avvalgi 7,3 foizdan 7,1 foizgacha sekinlashdi, ammo o‘tgan yilning mart oyidagi 10,3 foizlik inflyatsiyadan pastroq bo‘lib qoldi.

Oziq-ovqat mahsulotlari mart oyida o‘rtacha 1,2 foizga qimmatlashdi, yillik hisobda esa narxlar o‘sishi 5,6 foizni tashkil etdi. Nooziq-ovqat tovarlari bir oyda 0,3 foizga, bir yilda 5,3 foizga qimmatlashdi. Xizmatlar narxi oy davomida 0,2 foizga oshdi, yillik hisobda esa 12,7 foizgacha sekinlashdi.

Oziq-ovqat mahsulotlari ichida mart oyida go‘sht va asosiy mahsulotlar narxlari o‘sishda davom etdi: tuxum 2,1 foizga, mol go‘shti 1,2-1,8 foizga, qo‘y go‘shti 1,2 foizga, baliq 1,7 foizga, shakar 1,7 foizga qimmatlashdi. O‘simlik yog‘lari narxi 0,9 foizga, un narxi 0,6 foizga, sut narxi 0,3 foizga ko‘tarildi. Shu bilan birga, guruch va parranda go‘shti arzonlashdi.

Meva-sabzavotlar ichida pomidor 11,5 foizga, bulg‘or qalampiri 10 foizga, kartoshka 9,8 foizga, qovoq 9,4 foizga, olma 7,4 foizga, banan 6 foizga qimmatlashdi. Bodring, piyoz va sabzi narxlari esa pasaydi. Benzin narxlari o‘rtacha 0,9 foizga pasaydi, biroq yil davomida 9,2 foizga oshgan.

So‘mning yevro va frankka nisbatan mustahkamlangani hisobiga aviaqatnovlar 4,1 foizga, poyezd chiptalari 0,5 foizga arzonlashdi. Taksi xizmatlari va xalqaro avtobus qatnovlari narxlari ko‘tarildi. Uy-joy kommunal xizmat ko‘rsatish sohasida tariflar barqaror bo‘lib qoldi, ammo maishiy chiqindilarni olib ketish xizmatlari 0,9 foizga qimmatlashdi.

30-mart kuni bo‘lib o‘tgan yig‘ilishda prezident Shavkat Mirziyoyev inflyatsiyani 6-6,5 foiz darajasida ushlab turish vazifasini qo‘ydi. U oziq-ovqat mahsulotlarini import qilish, logistika muammolarini hal etish va muqobil transport yo‘nalishlaridan foydalanish bo‘yicha tezkor choralar ko‘rishni topshirdi. Markaziy bank raisi Timur Ishmetovning so‘zlariga ko‘ra, mamlakatda inflyatsiya 7,3 foiz darajasida saqlanib qolmoqda, biroq neft narxidagi tebranishlar va logistikadagi uzilishlar narxlarga bosimni kuchaytirishi mumkin.

Source: www.gazeta.uz