AQSh rejimi Livan va Isroil o‘rtasidagi sulhni mustahkamlash va muzokaralarning ikkinchi bosqichiga o‘tish uchun Isroilning Livandagi harakatlarini yumshatishga harakat qilmoqda. Bu haqda livanlik bir mansabdor shaxs Al Jazeera telekanaliga ma’lum qildi.

Anonimlik sharti bilan gapirgan mansabdor, aprel oyi o‘rtalarida Vashingtonda bo‘lib o‘tgan dastlabki raunddan so‘ng Isroil va Livan o‘rtasidagi muzokaralarning ikkinchi bosqichi rejalashtirilganini aytdi. Uning so‘zlariga ko‘ra, delegatsiya darajasidagi muzokaralar 17 may kuni AQSh poytaxtida boshlanadi va xavfsizlik hamda siyosiy yo‘nalishlarni qamrab oladi.

Reuters va AFP agentliklari AQSh Davlat departamentining noma’lum xodimiga tayanib, muzokaralar 14-15 may kunlari bo‘lishi mumkinligini xabar qildi. Isroil esa 8 may kuni Livanda bir kishini o‘ldirib, bir necha kishini yaraladi, bir kun avval Bayrut janubiy chekkasida Hizbullohning elita Radvan kuchlari qo‘mondoniga hujum qilgan edi.

Livanlik mansabdor, mamlakat prezidenti Isroil bilan harbiy harakatlarni yakuniy to‘xtatish masalasini muhokama qilishga intilayotganini ta’kidladi. Uning qo‘shimcha qilishicha, 17 maygacha kutilayotgan qadam sulhni uzaytirish va Isroilning o‘t ochishni to‘xtatish majburiyatidir. Bayrut janubiy chekkasidagi so‘nggi hujum muzokara jarayoniga to‘sqinlik qilish uchun Isroilning xabari sifatida baholandi.

Livan tinchlik shartnomasi emas, balki hujum qilmaslik to‘g‘risidagi paktga intilmoqda. AQSh prezidenti Donald Tramp tomonidan 16 aprelda e’lon qilingan sulh harbiy harakatlarni kamaytirgan bo‘lsa-da, Isroil va Hizbulloh bir-birlarini sulhni buzishda ayblashmoqda. Livan Sog‘liqni saqlash vazirligi ma’lumotlariga ko‘ra, 2 martdan beri Livandagi urushda 2700 dan ortiq kishi halok bo‘lgan, 1,2 million kishi uyini tark etgan.

Source: www.aljazeera.com