Xivada bo‘lib o‘tgan “Markaziy Osiyo – Germaniya” forumida O‘zbekiston va Germaniya o‘rtasidagi ikki tomonlama munosabatlarning barqaror ijobiy dinamikasi ta’kidlandi. Forumda ishtirok etgan Strategik va Mintaqalararo Tadqiqotlar Instituti (SMTI) direktori Eldor Aripov, 2025 yil yakunlariga ko‘ra, o‘zaro savdo hajmi 1 milliard dollardan oshganini eslatdi.

Aripovning ta’kidlashicha, O‘zbekistonda nemis kapitali ishtirokidagi 200 dan ortiq korxona faoliyat yuritmoqda. Hamkorlik tobora aniqroq texnologik sheriklik yo‘nalishiga o‘tmoqda. Uning so‘zlariga ko‘ra, Germaniyadan olib kelingan tovarlarning taxminan 55 foizi yuqori texnologik uskunalar va muhandislik yechimlaridan iborat bo‘lib, bu ikki mamlakat iqtisodiyotlarining o‘zaro to‘ldiruvchanligini aks ettiradi.

SMTI direktori kelajakdagi hamkorlikning ustuvor yo‘nalishlarini belgilab berdi: mashinasozlik, kimyo va elektrotexnika sohalarini rivojlantirish uchun maxsus shartlarga ega ixtisoslashtirilgan sanoat zonalarini yaratish, muhim mineral resurslarni birgalikda o‘zlashtirish va qayta ishlash, inson kapitalini rivojlantirish va mehnat mobililigini ta’minlash mexanizmlarini ishlab chiqish, ekologiya va suv resurslari sohasidagi hamkorlikni chuqurlashtirish, shuningdek, raqamli iqtisod va axborot texnologiyalari sohasida tizimli sheriklik modelini shakllantirish.

Aripov ta’kidlaganidek, Germaniyaning texnologik salohiyati va Markaziy Osiyoning resurs, demografik va logistika bazasining sinergiyasi uzoq muddatli va barqaror sheriklikni qurish uchun noyob sharoitlar yaratadi. U bu haqda shunday dedi: “Bu oddiy hamkorlik emas, balki texnologiyalar va resurslar, investitsiyalar va inson kapitali uyg‘unlashadigan yangi o‘zaro ta’sir arxitekturasini birgalikda shakllantirish haqida gap ketmoqda”.

Source: kun.uz