O‘zbekiston Prezidenti Shavkat Mirziyoyev 14-aprel kuni uy-joy qurilishi va urbanizatsiya masalalari bo‘yicha o‘tkazilgan yig‘ilishda 2026-yil davomida 140 mingta xonadonni foydalanishga topshirish va uy-joylarni renovatsiya qilish bo‘yicha ishlarni kuchaytirish rejalashtirilayotganini ma’lum qildi. U aholini uy-joy bilan ta’minlash masalasiga bosh vazir o‘rinbosari Achilbay Ramatov, Urbanizatsiya va uy-joy bozorini barqaror rivojlantirish milliy qo‘mitasi raisi Sherzod Kudbiyev hamda Qurilish va uy-joy kommunal xo‘jaligi vaziri Sherzod Hidoyatovning doimiy e’tibor qaratishini talab qildi.
So‘nggi yillarda 56 ta “Yangi O‘zbekiston” massivlarining infratuzilmasini rivojlantirishga 4,1 trillion so‘m yo‘naltirilgan bo‘lsa, 2026-yilda ushbu maqsadlar uchun yana 1,4 trillion so‘m ajratilmoqda. Biroq, davlat rahbari keng ko‘lamli moliyalashtirishga qaramay, hududlardagi jiddiy qoloqlikni ko‘rsatib o‘tdi va 2025-yilda rejalashtirilgan uy-joylar foydalanishga topshirilmaganligini ta’kidladi. 2025-yilda bosh vazir o‘rinbosarlari Achilbay Ramatov, Jamshid Qo‘chqorov, Urbanizatsiya qo‘mitasi rahbari Sherzod Kudbiyev va hokimlar “Yangi O‘zbekiston” massivlarida 34 mingta xonadon qurilishini yakunlashlari shart etib belgilandi.
Yangi qoida o‘rnatildi: qurilishi davom etayotgan massivni kengaytirishga o‘sha hududdagi 85 foiz kvartirani egasiga topshirganidan keyingina ruxsat beriladi. Prezident butun mamlakat bo‘ylab ko‘p kvartirali uylarni foydalanishga topshirish muddatlarini belgilab berdi va hisobotlar faqat amalda rasmiylashtirilgan obyektlar bo‘yicha qabul qilinishini alohida ta’kidladi. U Ramatov, Hidoyatov va hokimlarning bu yil hududlarda 140 ming xonadonli ko‘p qavatli uylarni foydalanishga topshirishlari shartligini aytdi, bunda 1-iyulgacha 20 ming, 1-oktabrgacha 50 ming, yil yakuniga qadar esa yana 70 ming uy topshirilishi lozim.
Davlat rahbari shaharlarning o‘sishi va uy-joylarni renovatsiya orqali yangilash masalasiga alohida to‘xtalib o‘tdi. U shahar va shaharchalar eniga kengayib borsa, infratuzilmaga xarajat 4-5 karra oshishi, maktab, bog‘cha va poliklinikalargacha bo‘lgan masofa uzayishi, minglab gektar ekin yeri qisqarishi kabi muammolarni ko‘rsatdi. Misol tariqasida Samarqand shahrining temiryo‘l orti hududlari, shuningdek, Kattaqo‘rg‘on, Oqtosh, Ishtixon, Bulung‘ur, Juma va Jomboy shaharlarida haligacha barak tipidagi uylar mavjudligi aytib o‘tildi.
Viloyat hokimi Adiz Boboyevga shu yilda shahar markazlaridagi eskirgan uylar o‘rnida renovatsiya asosida 2500 xonadonli yangi uylar qurish topshirildi. Umuman olganda, yil davomida viloyat hokimlari respublika bo‘yicha renovatsiya zonalarida kamida 30 mingta xonadon foydalanishga topshirilishi zarur. 7-aprel kuni bo‘lib o‘tgan majlisda senatorlar “Shaharsozlik renovatsiyasi to‘g‘risida”gi qonunni ma’qulladi, unda renovatsiya loyihalarini ko‘rib chiqish uchun aholining 80 foizining notarial roziligi talab etilishi va buzish ishlari barcha mulkdorlar bilan kompensatsiya masalalari to‘liq hal etilganidan keyingina amalga oshirilishi belgilandi.
Aholi va tadbirkorlar o‘rtasidagi ziddiyatlarning oldini olish maqsadida, renovatsiyaning birinchi bosqichida davlat investitsiya kompaniyalari ishtirok etadi. Ular rozi bo‘lganlar ulushini 80 foizga yetkazishi, qolganlar bilan nizolarni hal qilishi va shundan keyingina tayyor uchastkalarni auksionga chiqarishi lozim. Sherzod Kudbiyevning so‘zlariga ko‘ra, 80 foizga kelishuv bo‘lgandan keyin invest kompaniyaning huquqi bor va qolgan 20 foiz bilan sud orqali kelishish imkoniyati mavjud.
Source: www.gazeta.uz